Nydyrking
Nydyrking av areal til jordbruksformål krev løyve frå kommunen.
Nydyrking er opparbeiding av udyrka areal til fulldyrka eller overflatedyrka mark, og gjenoppdyrking av jordbruksareal som har lege unytta i over 30 år. Der fulldyrking er «rydding og bryting til vanlig pløyedybde slik at arealet kan nyttes til åkervekster eller til eng og beite som kan fornyes ved pløying» og overflatedyrking er «rydding og sletting av overflata slik at maskinell høsting er mulig», jf. §3 i Forskrift om nydyrking.
Merk:
- Opparbeiding av overflatedyrka jord til fulldyrka jord blir ikkje rekna som nydyrking etter forskrifta.
- Innmarksbeite blir rekna som «udyrka areal» etter forskrifta. Opparbeiding av innmarksbeite til overflatedyrka eller fulldyrka jord blir altså rekna som nydyrking, og må behandlast etter forskrifta.
- Drenering, rydding og sletting av innmarksbeite blir rekna som nydyrking når maskinell hausting med tohjulstraktor blir mogleg. Ut over dette vil opparbeiding av udyrka areal til innmarksbeite falla utanfor forskrifta sitt verkeområde. Rydding kan likevel vera omfatta av andre regelverk, her den generelle aktsemdsplikta etter §6 i Naturmangfoldloven.
- Nydyrking av myr er ikkje tillaten, men kommunen kan i særlege tilfelle gi dispensasjon til nydyrking av myr, jf. §5a i Forskrift om nydyrking.
Meir informasjon og søknadsskjema til nydyrking kan finnast på nettsida til Landbruksdirektoratet.
Søknaden blir behandla av kommunen. Statsforvaltaren i Agder er klageinstans.
Søknad om nydyrking blir send til kommunen:
Epost: post@aseral.kommune.no
Post: Åseral kommune, Gardsvegen 68, 4540 Åseral
Planering
Varige terrenginngrep krev løyve. Større inngrep skal behandlast etter plan- og bygningslova.
Mindre tiltak som planering av jordbruksareal og bakkeplanering, for å gjera brattlendt eller kupert dyrkbart og tidlegare dyrka areal skikka for maskinell jordbruksdrift, er søknadspliktig etter §4-4 i forurensningsforskriften.
Det er ikkje eige søknadsskjema for planering, men søkjar må senda inn ein forenkla søknad som skal innehalda kart som viser kva område som vil bli ramma av planeringa. Merk: Viktige natur/terrenginngrep, bekkelukkingar mv. skal merkast på kartet, jf. §4-4 andre ledd i forurensningsforskriften. Planen skal også vera «i samsvar med kravene i «Tekniske retningslinjer for anlegg, drift og vedlikehold av planeringsfelt» fastsatt av Landbruksdepartementet.», jf. §4-5 i forurensningsforskriften.
Søknaden blir behandla av kommunen.
Søknad om planering blir send til kommunen:
Epost: post@aseral.kommune.no
Post: Åseral kommune, Gardsvegen 68, 4540 Åseral
